اسلام آباد (گرین ٹی وی رپورٹ)پولیس کو پاکستان تحریک انصاف(پی ٹی آئی) کے چیئرمین عمران خان، سابق وزیر خزانہ شوکت ترین اور پنجاب اور خیبر پختونخوا کے موجودہ وزرائے خزانہ محسن خان لغاری اور تیمور خان جھگڑا کے خلاف غداری کا مقدمہ درج کرنے کے لیے درخواست دائر کر دی ہے۔ پیر کے روز ٹی وی چینلز اور سوشل میڈیا کے ذریعے دو آڈیو کلپس منظر عام پر آئے جن میں شوکت ترین نامی شخص کو دونوں صوبائی وزرا کو یہ ہدایت کرتے سنا جا سکتا ہے کہ وہ وفاقی حکومت اور آئی ایم ایف سے کہیں کہ وہ پاکستان میں تباہی مچانے وا حالیہ سیلاب کی روشنی میں صوبائی بجٹ سرپلس کا وعدہ پورا نہیں کر سکیں گے۔ان آڈیوز کے بعد پی ٹی آئی کے خلاف تنقید کا آغاز ہوا اور حکمران اتحاد نے ان پر الزام لگایا کہ یہ آئی ایم ایف کے ساتھ حکومت کے معاہدے کو پٹڑی سے اتارنے کی سازش کے سوا کچھ نہیں،ذرائع سے دستیاب  درخواست ای-7 کے رہائشی امن ترقی پارٹی کے بانی اور چیئرمین محمد فائق شاہ نے تھانہ کوہسار میں جمع کرائی ہے۔شکایت کنندہ نے بتایا کہ 29 اگست کو رات 11 بج کر 50 منٹ پر انہوں نے صحافی حامد میر کا ایک ٹویٹ دیکھا جس میں دو آڈیو شیئر کی گئیں، ان آڈیوز میں شوکت ترین صوبائی وزرا محسن لغاری اور تیمور خان جھگڑا کو ہدایت دے رہے تھے کہ وہ آئی ایم ایف کے معاہدے میں رکاوٹیں پیدا کریں۔